Aalisarnermik, piniarnermik aallaaniarnermillu nakkutilliineq

KANUAANA nakkutilliisoqatigiinnik sulisoqarpoq aalisarneq pillugu alapernaarsuisunik, aalisarneq piniarnerlu pillugit nakkutilliisunik, taakku Kalaallit Nunaanni aalisarnermik, piniarnermik, aallaaniarnermillu nakkutilliineq nalinginnaasumik isumagisaraat.

Aalisarnermik, piniarnermik aallaaniarnermillu nakkutilliineq marlunnut avinneqarsinnaavoq:

  1. Sinerissap qanittuani nunamilu nakkutilliineq
  2. Avataasiortuni nakkutilliineq

Sinerissap qanittuani nunamilu nakkutilliineq
Sinerissap qanittuani aalisarnermik nunamilu piniarnermik allaaniarnermillu nakkutilliineq KANUAANA-mi aalisarnermik piniarnermillu nakkutilliisunit suliarineqartarpoq, taakkua sineriammi illoqarfinni annerusuni inissisimapput.

Nakkutilliisut amerlassusaat eqqarsaatigalugu nakkutilliinerup qanoq annertutiginera suliassartaasalu aaqqissuunneqarneri apeqqutaasarput, ukiullu ingerlanerani nakkutilliineq allanngorarsinnaasarluni. Nakkutilliinermi aalisarnerup annertussusaa, tassani ilanngullugit pisassiissutit, umiarsualiviit amerlassusaat, isorartussutsit, angallatit suuneri kiisalu unioqqutitsilluni tulaassisoqaratarsinnaanera imaluunniit unioqqutitsilluni aalisartoqaratarsinnaanera eqqarsaatigisariaqarpoq.

Sinerissap qanittuani immami aalisarnermik kiisalu kilisaatit nunatsinneersut nunani allaneersullu tulaassineranni nakkutilliisarput. Nunami nakkutilliinermut assersuutigalugu umimmanniarnermik arfanniarnermillu nakkutilliineq suliassanut ilaapput. Ilanngullugu aalisarnermik piniarnermillu nakkutilliisut aalisarneq piniarnerlu pillugit paasisitsiniaanermut ikiuisarput kiisalu kommunini inuussutissarsiornermut siunnersortinik suleqateqarlutik. Taamaattumik sumiluunniit nakkutilliinermik pitsaalluinnartumik ingerlatsinissamut nakkutilliisut pisariaqartumik piginnaasaqarput, kiisalu nunat tamat akornanni aalisarnermik nakkutilliinermut peqataasarlutik. Aalisarnermik nakkutilliisut suliassaraat qularnaassallugu aalisarnermik inatsisit eqqortinnissaat atortinnissaallu.

Nakkutilliinermik suliassanut tunngatillugu nakkutilliisooqatigiit angallateqarput tallimanik 11 meterit miss. tamarmiusumik takissusillit kiisalu umiatsiaaqqat ammasut 19’ arlallit. Aamma sulinermi biilit pingasut, qamuteralaat ATV-illu arlallit atorneqarsinnaallutik.

Ullumikkut nakkutilliisooqatigiit illoqarfinnut ukununnga agguagaapput: Ilulissat, Sisimiut, Maniitsoq, Nuuk aamma Ittoqqortoormiit.

Avataasiortunik nakkutilliineq
Sinerissap qanittuani aalisarnermik nakkutilliisut saniatigut, KANUAANA-mi nakkutilliisooqatigiinnut aamma ilaapput aalisarnermik alapernaarsuisut aqqaneq-pingasut. Aalisarnermik alapernaarsuisut suliassaraat aalisariutini avataasiutini aalisarneq nakkutigissallugu, tassa imaappoq aalisarneq malinnaaffigalugu nakkutigalugulu, tassani ilanngullugu pingaartumik pisat eqqortumik nalunaarsorneqarnissaat unioqqutitsillunilu eqqaasoqannginnissaa qularnaassallugu. Aalisarnerup ingerlanerani naalagaq aamma ilitsersorsinnaavaat unioqqutitsisoqartillugulu nalunaarusiortarlutik unnerluutiginnittarlutillu. Kisianni suliap ingerlateqqinnissaanut alapernaarsuisutut inatsisitigut tunngavissaqaratik.

Arktisk Kommandomik Søfartsstyrelsemillu suleqateqarneq
KANUAANA aamma Arktisk Kommandomik (AKO) qanimut suleqateqarpoq. AKO Kalaallit Nunaata imartaani killeqarfik aningaasaqarnikkut akisussaaffeqarfiusumi aalisarnermik nakkutilliisarpoq pisariaqartumillu polititut oqartussaaffeqarluni. AKO arlalinnik nakkutilliissutinik umiarsuaateqarpoq. KANUAANA avataasiortunik nakkutilliinermut atorsinnaasumik angallataateqanngimmat, AKO-mik suleqateqarneq pingaartuuvoq nunatsinnilu aalisarnermik nakkutilliinermi sunniuteqarluarluni.

AKO-mik suleqateqarnerup saniatigut, KANUAANA aamma Søfartsstyrelse angallatinut nalunaarsuiffik pillugu qanimut attaveqaqatigiipput. Aalisarnermik nakkutilliisunik ilinniartitaanermut atatillugu KANUAANA aamma qallunaat aalisarnermik nakkutilliisoqarfiannik suleqateqarpoq.

Aamma atuaruk ...

Aalisarnermik, piniarnermik aallaaniarnermillu nakkutilliineq

Aalisarneq, piniarneq aallaaniarnerlu pillugit KANUAANA-p nakkutilliinermi suliai pillugit uani atuarsinnaavatit.

Aalisariutinik alapernaarsuineq

KANUAANA-p qaammataasakkut atortut iluaqutigalugit aalisariutit alapernaarsugarai. Angallatit aalajangersimasut inuussutissarsiutigalugu aalisarnermik ingerlatsiniarunik alapernaarsuinermut atortunik ikkussuinissamut pisussaaffeqarput.

Aalisariutit inuttalersugaanerat

Uani kalaallit aalisariutaanni inuttat pillugit malittarisassat atuuttut atuarsinnaavatit.

Tulaassinermik nakkutilliineq

Kingusinnerusukkut ikkunneqassaaq…

Nakkutilliinermi kisitsisit

KANUAANA-p suliai pillugit kisitsisit uani nassaarisinnaavatit. Nakkutilliinermi kisitsisit qaammatit pingasukkuutaarlugit naatsorsorneqartarput paasissutissallu piareeraangata nutarterneqartarlutik.

Scroll to Top