Tunisineq paasineqassaaq aalisartup pisisartullu akornanni iliortoqarnera. Aalisakkanik pisarisannik pisisartumut tunisiguit, tulaassinermi nalunaarummik, iliuusineq tamanna uppernarsarniarlugu tunineqassaatit.

Aalisartoq, aalisarsinnaanermut akuersissut, angallat aalisaatillu atorneqartut kiisalu pisat pillugit paasissutissanik tulaassinermi nalunaarut imaqassaaq. Pisat pillugit paasissutissat tassaapput assersuutigalugu pisarineqarneranni sumiissuseq piffissarlu, aalisakkat suut pisarineqarnersut annertussusaallu kiisalu saniatigut pisaqartoqarsimappat igitsisoqarsimappalluunniit paasissutissat ilanngullugit. Pisat tunineqanngitsut pillugit paasissutissanik aamma ilisimatitsisussaavutit, soorlu aalisakkanik nammineq tigummisaqarsimaguit.

Tunisinermi ulloq annertussusaallu aatsaat allassavatit tunisineq naammassippat. Paasissutissat eqqortuuneri uppernarsarniarlugu tulaassinermi nalunaarut atsiussavat.

Pisisartumut tunisinermi pisatit tamaasa nalunaarutiginissaannut inuussutissarsiutigalugu aalisartutut pisussaaffeqarputit. Illit tunisinerit pillugu paasissutissat Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) ingerlateqqinnissaat pisisartup isumagissavaa.

Aalisarnermi, umiarsuup allattaaviinik allattuinermik pisussaatitaanngitsumi, pisassiissutinik atuineq  KANUAANA-mit naatsorsorsinnaaqqullugu tunisinermi nalunaarutiginnittarneq pisariaqarpoq.

Tulaassinermi nalunaarut immersorneqartussaq, paasissutissanik nalunaarutigineqartussanik imaqartussaq, uani nassaarisinnaavat.