Pisisartumut tunisineq

Kalaallit Nunaanni suliffissuarnut tulaassinerit tamarmik tunisinermi nalunaarutigineqartussaapput.

Tunisinerit pillugit paasissutissat Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) nassiunnissaannut pisisartutut pisussaatitaavutit. Pingaaruteqarpoq tunisinermi aalisartup aalisariarnera pillugu paasissutissat tamarmik ilanngunneqarnissaat, aamma aalisarnerup nalaani saniatigut pisaqarsimappat igitaqarsimappalluunniit. Aalisartup pisami ilaanik nammineq tigummisaqarsimappat, aamma tamanna tunisinermi paasissutissanut ilanngunneqartariaqarpoq.

Aalisarnermi, umiarsuup allattaaviinik allattuinermik pisussaatitaanngitsumi, pisassiissutinik atuineq  KANUAANA-mit naatsorsorsinnaaqqullugu tunisinermi nalunaarutiginnittarneq pisariaqarpoq.

Aalisakkanik tunisassianik EU-mut annissuisinnaanermut nalunaarutiginnittarneq aamma piumasaqaataavoq pingaaruteqartoq.

EU-mut annissuinissanut tamanut nalunaarutiginnittarneq piumasaqaataammat, annissuisartoq EU-mut uppernarsaammik atugassatut pisanik uppernarsaammik atuutilersitsineq pillugu qinnuteqannginnermini tunisinermi nalunaarut nassiutereerneqartariaqarpoq.

Tulaassinermi nalunaarut

Aalisartup pisani tulaappagit, pisiortortutut pisanik tulaassinermi nalunaarummik immersuisussaavutit, taannalu aalisartup atsiortussaallugu.

Tulaassinermi nalunaarutit assigiinngitsut pingasut sananeqartarput:

  • Tulaassinermut nalunaarut kalaallit aalisariutaannut umiarsuup allattaaviinik allattuinissamut pisussaaffeqartunut (angallatit 9,4 meter sinnerluguluunniit tamakkiisumik angissuseqartunut)
  • Tulaassinermut nalunaarut kalaallit aalisariutaannut umiarsuup allattaaviinik allattuinissamut pisussaaffeqanngitsunut (angallatit 9,4 meter inorlugu tamakkiisumik angissuseqartunut)
  • Tulaassinermut nalunaarut toqqaannartumik annissinissaq siunertaralugu Kalaallit Nunaanni imaluunniit nunani allani tulaassisunut

Tunitsivittut tunisinerit pillugit paasissutissat KANUAANA-mut ingerlateqqissavatit qarasaasiakkut atuarneqarsinnaasunngorlugit.

Tunisinermi nalunaarummut immersugassaq ilitsersuullu uani aasinnaavatit.

Nalunaarutiginnittarnermi ingerlariaatsit

Tunisinermi nalunaarutigineqartunut paasissutissat KANUAANA-mut kingusinnerpaamik ataasinngornerit tamaasa nal. 12:00 nassiunneqassapput.

KANUAANA piumasaqarsinnaavoq, pisisartutut tunisinermut nalunaarutit sapaatip akunneranit akulikinnerusumik nassiussisassasutit. Assersuutigalugu pisassiissutit nungunneqalernerisa nalaanni tamanna pisinnaavoq.

Pisisartutut KANUAANA-p piumasaqarneratigut tulaassinermi nalunaarutit, inuussutissarsiutigalugu aalisartunit aalisakkanik tunisinerminnut atatillugu atsiorneqartut, tamaasa KANUAANA-mut ingerlateqqinnissaannut pisussaaffeqarputit. Tulaassinermi nalunaarutit minnerpaamik ukiuni pingasuni tunitsivimmi uninngatinneqassapput.

Umiarsuup allattaavii tunisinermi tunniunneqartut ingerlateqqinnissaat pisisartup aamma pisussaaffigaa. Tunisinermi pisanut tunngasut umiarsuup allattaavii pisisartup naqissusissavai, atilerlugit ullulerlugillu. Umiarsuup allattaaviisa assigi aalisartumut tunniunneqassapput, umiarsuullu allattaavii KANUAANA-mut nassiunneqassallutik. Taakku sap.ak. qaangiuttumi tiguneqartut ataasinngornerit tamaasa nassiunneqartassapput.

Tunisinermi paasissutissat mailikkut tigunerinut KANUAANA uppernarsaassaaq, paasissutissanut nassiunneqartunut iluarsiissutissaqarpat, KANUAANA-p pisisartoq toqqaannartumik attaveqarfigissavaa.

Tunisinernut pisoqqanut iluarsiissutit

Tunisinernut pisoqqanut, KANUAANA-mut nassiunneqareersunik, pisisartutut iluarsiissutissaqaruit, iluarsiissutissat piaarnerpaamik KANUAANA-mut nassiunneqassapput. Pingaaruteqarpoq KANUAANA-mi iluarsiissutit nalunaarsoqqanissaat, nuna tamakkerlugu pisassiissutinut ilaatigullu aamma aalisartup nammineq pisassiissutaanut isumaqarsinnaammata.

Tunisinermi paasissutissat iluarsiissutinik imaqartut nalinginnaasumik nassiuttarneratut KANUAANA-mut mailikkut nassiunneqassapput.

Aamma atuaruk ...

Inuussutissarsiutigalugu aalisartut tunisisarnerat

Inuussutissarsiutigalugu aalisartut tulaassinermi nalunaaruteqartarnerat pillugu uani atuarsinnaavatit ilitsersuutaa aasinnaallugu

Pisiortortunut tunisisarneq

Pisiortortup pisussaaffii pillugit paasissutissat uani atuarsinnaavatit kiisalu ilitsersuutit immersugassallu aasinnaallugit

Saniatigut pisat

Saniatigut pisat, tassani korallit, immami pupiit, miluumasut imarmiut timmissallu pillugit nalunaaruteqartarneq uani atuarsinnaavatit

Nalunaaruteqartarnerit

Nalunaarutit assigiinngitsut pillugit immersugassat uani atuarsinnaavatit ilitsersuutillu aasinnaallugit

Umiarsuup allattaaviinik immersuineq

Umiarsuup allattaavii assigiinngitsut pillugit uani atuarsinnaavatit ilitsersuutillu aasinnaallugit

Scroll to Top