Kalaallit Nunaanni aalisarnermi saniatigut pisat tassaapput imaani uumassusilinnik pisat tamarmik, angallatip aalisartulluunniit aalisarsinnaanermut akuersissutaanut.ilaanngitsut.

Assersuutigalugu inuussutissarsiutigalugu aalisartutut saarullinnut akuersissuteqaruit, aalisariarninnilu qassutinnik qaleralinnik pisaqarlutit, taava qalerallit saniatigut pisatut nalunaarutigissavatit. Qaleralinnut aalisarsinnaanermut akuersissuteqaruit saniatigut pisatut naatsorsuutigineqassanngillat, tunisinermilu umiarsuulluunniit allattaaviinut nalinginnaasumik pisatut nalunaarutigineqassallutik.

Avalatitseqqiineq

Bundgarnersorluni aalisarnermi aalisakkat mikivallaat angallammi uninngatinneqassanngillat, kisianni imaanut avalatseqqinneqassallutik, sapinngisamik ajornanngippat uumatillugit. Eqqumaffigiuk aalisakkat avalatseqqinneqartut aamma umiarsuup allattaaviinut tunisinermiluunniit nalunaarutigineqassammata.

Nataarnat saniatigut pisarineqartut (qalorsuaanngitsunik atortoqarluni pisarineqartut) angallammi uninngatinneqassanngillat, kisianni imaanut avalatseqqinneqassallutik, sapinngisamik ajornanngippat uumatillugit.

Saattuat

Saattuat arnavissat sapinngisamik uumatillugit imaanut avalatseqqinneqassapput.

Saattuat angutivissat qaleruaata nuuaniit isuata tungaanut 10 cm ataallugu angissuseqarpata imaanut avalatseqqinneqassapput.  Qaleruaaniit niuata pingajuata tungaanut uuttorneqassaaq.

Saattuat aqitsut

Saattuat aqitsut imaanut avalatseqqinneqartassapput umiarsuullu allattaavianut nalunaarsorneqartuaannassallutik. Aalisartutut saattuanik aqitsunik saniatigut pisatut nalunaarsukkatit pisassiissutinut ilanngaataanavianngillat. Saattuat tunisat kisiisa pisassiissutinit ilanngaataassapput.

Saattuat aqitsut umiarsuup allattaavianut nalunaarsorneqartarnissaat pingaaruteqarpoq, ilisimasat siunissaq ungasinnerusoq eqqarsaatigalugu saattuanniarsinnaanissap qulakkeerinneqataasarmata.

Bitter Crab Disease (saattuat nappaataat)

Saattuat BCD-imik (Bitter Crab Disease) tunillanneqarsimasut avalatseqqinneqassanngillat, nunamulli tulaanneqassallutik. Tamanna saattuanut napparsimanngitsunut siaruarnissaa pinaveersaarniarlugu.

Korallit aamma immap pupii

Korallit immallu pupii artiupput nunatsinni aalisarnissaannut akuersissuteqarfigineqarsinnaanngitsut. Taamaammat tamatigut saniatigut pisatut taaneqartassapput.

Korallinik aamma immap pupiinik pisat umiarsuup allattaaviinut allanneqartuaannassapput.

Kilisannermi ataatsimi korallinik uumasunik 60 kiilut aamma/imaluunniit immap pupiinik uumasunik 300 kiilut sinnerlugit pisaqaruit:

• aalisarnerit unitsissavat
• kaliffippit naammassinerani inissisimaffigisannit minnerpaamik 2 sømilinik ungasitsigisumut nuussaatit, korallinik immamilu pupinnik pisaqarnissamut ilimaginnginnerpaasannut
• mailikkut KANUAANA-mut nalunaaruteqassaatit.

Korallit immallu pupii ilisimalernissaannut ilitsersuut assigiinngitsunik oqaasertalik aasinnaavat:

Korallit: Kalaallisut, Qallunaatut, Tuluttut

Immap pupii: Tuluttut

Miluumasut imarmiut

Eqqaamallugu aalisaatinnik pisatit tamaasa umiarsuup allattaaviinut nalunaarsussagakkit tunisinermiluunniit paasissutissiissutigalugit. Miluumasunik timmissanilluunniit imarmiunik pisaqaruit, umiarsuup allattaaviinut aamma nalunaarsussavatit. Miluumasunik imarmiunik timmissanillu taaguutit pillugit allattukkat uani nassaarisinnaavatit.